ILOILO CITY- Nasapwan nga wala na sang kabuhi kag may mga pilas sa lawas ang isa ka lalaki sa kahilamunan sa Brgy. Banuyao, La Paz, Iloilo City.
Ang biktima amo si Ronnie Suficiencia, residente sang McArthur, La Paz kag isa ka tricycle driver.
May nakita nga pilas sa ulo nga ginapatihan agi sang paglampos sang matig- a nga bagay.
Sa interview naman sang Bombo Radyo kay PLt Greg Matutino, imbestigador sang La Paz Police Station, iya ginpahayag nga posible nga hold-up ang natabo bangud wala na ang bag kag mga alahas sang biktima.
Nakit-an naman ang ginabyahe nga tricycle sang biktima malapit lang sa iya bangkay.
Suno kay Matutino, ginalantaw nga duha ka tawo ang nangamot sa pagpatay kay Suficiencia.
Nagapadayon pa ang imbestigasyon sang kapulisan tuhoy sa krimen.
