ILOILO CITY– Ginareklamo sang mga driver ang mga kolorum nga tricycle sa syudad sang Iloilo.
Sa interview sang Bombo Radyo kay Jose Pepito Tabuada, presidente sang Quintin Salas, Tacas Tricycle Driver Association (QSTTDA), iya ginpahayag nga kadungan sang pag-apruba sang P15 nga taripa, amu ang ila kahangawa sa wala untat nga pagbyahe sang mga kolorum.
Suno sa iya, apektado ang ila kita bangud nagadamo na gid ang kolorum sa syudad.
Suno kay Tabuada, ang mga kolorum ang nagaguba sang ila suktanay sa mga pasahero.
Nagpahanumdum man ini sa mga commuters nga i-check gid ang body number sang mga tricycle.
Suno sa iya, ang mga kolorum nga tricycle ang wala sang body number.
Makapila naman ka beses nga nagpalab-ot sang reklamo ang mga drivers sa Iloilo City Government nga pauntaton ukon punggan na ang pagbyahe sang mga ini.
Samtang, ginkalipay naman sang mga drivers ang pag-apruba sang ila taripa nga P15 agud nga may mapresentar sa mga pasahero nga masami nagapamangkot sang plete.
