Iloilo City – Ginkadismaya sang pila ka mga tricycle drivers ang natalana nga pagpatuman sang ordinansa nga magasukot sang parking fee sa pila ka mga designated areas sa syudad.
Lakip sa mga balaydan amo ang masunod:
Para sa single nga motorsiklo, P15 para sa una nga duha ka oras kag P5.00 sa succeeding hours.
Sa tricycle naman, P20 para sa una nga duha ka oras kag P5.00 sa succeeding hours.
Sa light vehicles, P25 para sa una nga duha ka oras kag P5.00 sa succeeding hours kag
Sa medium vehicles lakip na ang delivery trucks, P30 para sa una nga duha ka oras kag P5.00 sa succeeding hours.
Sa interview sang Bombo Radyo kay Joel Salonga, isa ka tricyle driver sa Iloilo City Proper, iya ginpahayag nga tuman ka-mahal sang sukot para sa parking fee kun sa diin indi sa tanan nga bes may pasahero ini.
Suno kay Salonga, kadungan man sang pagmahal sang mga balaklon, nagdugang man sa iya ginaproblemahan ang parking fee.
Ginpahayag sang natungdan nga magapabor ini sa pagbayad, pananglitan nga madiretso ang kwarta sa gobyerno.
Nahibaluan nga ang Local Economic Enterprise Office amo ang magapatigayon sang pagpanukot sang parking fee.
