Ginsaylo subong nga Lunes, Enero 13, ang trilateral phone call sa tunga nanday President Ferdinand Marcos, Jr., outgoing US President Joe Biden kag Japanese Prime Minister Shigeru Ishiba.
Suno sa Presidential Communications Office, ang US ang nag-request sang adjustment sa meeting bangud gintutukan anay ni Biden ang nagakatabo nga sunog sa Los Angeles county sa California.
Kahapon kuntani sang aga ang nauna nga schedule sang ila virtual meeting.
“The Trilateral Leaders’ Phone Call with the US President, the Prime Minister of Japan and the President of the Philippines has been moved to 7 a.m. on Monday, Jan. 13 (Manila time),” suno kay Chavez.
Wala ginsapubliko sang Malacañang kun ano ang mangin agenda sa meeting apang ginsiling sang PCO nga magapaguwa sila sang statement kun matapos na ang phone call.
May nauna nga reports nga possible diskusyunan sang tatlo ka mga lider ang ila progress nga nahimo sa Philippines-Japan-US trilateral cooperation halin sang ginpatigayon ang maragtason nga trilateral summit sa Washington sang Abril 2024.
Matabo man ini nga meeting sa tunga sang kahangawa dala sang China nga agresibo na gid sa pagsulod kag paglayag sa EEZ sang Pilipinas. Ang latest nga tikang sang China amo ang pagpadala sang ila nga “monster ship” malapit sa Capones Island sa Zambales.
