ILOILO CITY – Liwat magapirma sang waiver subong nga adlaw si Sen. Antonio Trillanes nga iagahatag sini sa Anti-Money Laundering Council (AMLC) para imbestigaran ang mga akusasyon sa iya ni Presidente Rodrigo Duterte nga mga bank accounts.
Ginhatagan sang senador sang 15 ka adlaw nga ultimatum ang AMLC para usisaon ang nasambit nga mga accounts kag kun indi maaksyunan ang iya waiver, kasuhan sini ang ahensiya.
Sa interview sang Bombo Radyo Iloilo, ginsabat ni Trillanes ang akusasyon sang Presidente nga wala na siya sang account sa bangko sa Singapore bangud ginpasira na ini sang senador antes nagpadulong sa nasambit nga pungsod.
Suno kay Trillanes, paano sini mapasira ang bank account kun mismo ang bangko ang nagpamatuod nga indi siya kliyente.
Dugang pa sini, kun may ginpasira nga account, maguwa ini sa record sang bangko nga “closed account” nga wala matabo suno kay Trillanes.
Ginhangkat ni Trillanes si Presidente Rodrigo Duterte nga magpirma sang waiver agud pamatud-an nga sala ang iya akusasyon angot sa ginapahayag bank accounts sang Chief Executive.
Kun mapamatud-an ni Duterte nga sala ang iya akusasyon, ginpahayag ni Trillanes nga ma-resign siya sa Senado kag mapa-preso sa presuhan nga gusto ni Duterte para sa iya.