Trip-off sa Sta. Barbara substation sang NGCP, ginaimbestigaran pa

ILOILO – Nagapadayon pa ang imbestigasyon sang National Grid Corporation of the Philippines (NGCP) may kaangtanan sa natabo nga trip-off sa ila substation sa Sta. Barbara, Iloilo.

Sa interview sang Bombo Radyo kay Michelle Visera, Regional Corporate Communications and Public Affairs Officer sang NGCP sa Western Visayas, apektado sang trip-off ang suplay sang kuryente sa Antique Electric Cooperative Incorporated (ANTECO), Guimaras Electric Cooperative Incorporated (GUIMELCO), Iloilo Electric Cooperative Incorporated 1 (ILECO 1), kag porsyon sang More Electric and Power Corporation (MORE Power) sa syudad sang Iloilo.

Suno kay Visera, sa inisyal nga pagpangusisa, gin-igu sang kilat ang lines 1 kag 2 sang amo nga substation takna 9:45 sa gab-i.

Naamat-amat balik ang suplay sang kuryente sa Iloilo City, Iloilo Province, kag Guimaras takna 11:30 sa gab-i apang nadugayan lang sa San Jose substation sa Antique.

Ginpaathag ni Visera nga nadugayan ang power interruption bangud mayor nga linya ang gin-igu sang kilat kag kinahanglan nga tsekyaron ang equipment antes ibalik ang kuryente agud malikawan ang dugang nga halit sa mga kagamitan.

Nagapadayon man subong ang assessment sa halit nga natuga sang amo nga trip-off.