ILOILO CITY – Agaw atensyon subong ang triplets nga arnis players matapos makakuha sang gold medal sa Palarong Pambansa 2017.
Ini amo sanday John Christian, John Clark kag John Carl Segutier sang Calumpang Molo, Iloilo City kag Grade 10 students sang Iloilo National High School.
Sa exclusive interview sang Bombo Radyo kay John Christian, ginpahayag sini nga basketball ang hilig nila sang iya utod nga si John Carl, samtang arnis naman ang hilig ni John Clark.
Nadag-an sang triplets ang Team Solo Basto, Team Espada kag nakuha naman ni John Clark ang gold medal sa Individual Solo Baston.
Apang sa ulihi, nakita nila nga maayo ini nga self defense kag bonding tubtub nga tatlo na sila ang nagahampang sang arnis.
Antes magtulog naandan na sang mga ini nga magpraktis sang arnis.
Gin-athag man ni John Christian nga nahimo man nila mabalanse sa gihapon ang pagtuon kag paghampang sang arnis.
Samtang suno naman kay John Carl, luyag nila nga mangin ehemplo sa mga mag-utod nga naga-ugyon pinaagi sa sports.
Handom naman sang triplets nga makahampang sa Southeast Asian (SEA) Games sa 2019.