ILOILO CITY – Dakop ang isa ka trisikad driver bangud sa pagkawat sang 17 ka bilog nga payong sa isa ka commercial establishment sa syudad sang Iloilo.
Sa interview sang Bombo Radyo kay Police Staff Sergeant Neil Erick Guñabo, imbestigador sang Police Station 1, iya ginpahayag nga ang suspek ang ginkilala nga si Fritz Bermejo, 28, sang Brgy. Sta. Rita, Janiuay, Iloilo.
Suno kay Guñabo, mismo ang security manager sang commercial establishment ang nakadakop sa suspek nga nagapangawat.
Ginpahayag ni Guñabo nga santo sa panaysayon sang suspek, naka-agi na siya sadto nga nadakpan apang wala lang napasakaan sang kaso.
Ang mga ginkawat nga payong ang ginsulod sang suspek sa isa ka travelling bag.
Suno naman kay Bermejo, isa siya ka trisikad driver kag may yara na sang kaugalingon nga pamilya.
Ang isa ka bilog nga payong ang nagabili sang P189 apang iya ini nga ginabaligya sa mas barato nga presyo.
Suno sa suspek, nagahinulsol siya sa iya nahimo nga sala.
