ILOILO CITY– Nagreklamo sa Molo Police Station ang isa ka trisikad driver matapos ginapahayag gintayaan sang armas ni Engr. Randy Pastolero.
Sa interview sang Bombo Radyo sa tagreklamo nga si Joe Caruel, iya ginpahayag nga nagdul-ong siya sang iya pasahero sang nagpark sa higad sang iya trisikad ang salakyan ni Pastolero.
Suno kay Caruel, nagtulukay sila ni Pastolero kag sang ulihi, gintayaan siya sang armas kag nakita pa ini mismo sang iya lima ka tuig nga bata.
Gilayon nga nagreklamo sa Molo Police Station kag gin-updan siya balik sa area sa diin gintumod sang pulis ang sakay sang salakyan nga si Engr. Pastolero.
Dugang pa ni Caruel, nakita pa mismo sang pulis nga may gintago nga armas sa salakyan si Pastolero.
Samtang, ginklaro ni Pastolero nga wala siya nagpanaya sang armas sa trisikad driver.
Sa interview sang Bombo Radyo kay Pastolero, iya ginpahayag nga nagpark siya sang iya salakyan bangud ginahulat niya ang gintake-out nga pagkaon sa fastfood chain.
Suno kay Pastolero, nagtulukay lang man sila sang trisikad nga indi niya kilala.
Ginpanginwala man ni Pastolero nga may yara siya sang armas bangud nga nagpatigayon man sang inspection ang pulis.
Ginkakibot lang niya suno kay Pastolero nga may nagpanuktok nga pulis sa iya salakyan kag ginpamangkot siya tuhoy sa ginareklamo sang trisikad driver.
Magahimo naman siya sang legal nga tikang suno sa natungdan bangud nabutang sa alang-alang ang iya pangalan.
