ILOILO CITY–Wala sang may napatay sa bahin sang Armed Forces of the Philippines (AFP) matapos ang engkwentro batok sa New Peoples Army (NPA) sa Sitio Ali, Barangay Malublub, Leon, Iloilo.
Sa interview sang Bombo Radyo kay Lt. Col. Benedict Arevalo, commander sang 301st Infantry Brigade, iya ginpahayag nga wala sang may napatay sa bahin sang suldado.
Sa subong suno kay Arevalo, ila papason ang tanan nga NPA nga ila makita.
Maisog nga ginpahayag ni Arevalo nga indi mag-untat ang tropa sang gobyerno sa pagpangita sa iban pa nga  katapo sang rebelde nga grupo.
Indi gid mag-isol ang tropa sang gobyerno sa inaway suno kay Arevalo.
Samtang, wala sang may napilasan sa mga katapo sang 61st Infantry Batallion sang Philippine Army matapos ang engkwentro nga nagluntad sa Sitio Gumawa, Brgy East Villaflores, Maayon, Capiz.
Masobra sa 20 ka minutos ang kalawigon sang engkwentro tubtub nga nakalab-ot ang NPA sa Brgy. Bongbongan, Maayon, Capiz.
Suno sa Philippine Army, indi magnubo sa 10 ka terorista nga katapo sang Sangay Partido Pamproganda -East, Komiteng Rehiyon-Panay ang ila naka-away.
Ini na ang ikawalo nga inaway sa tunga  sang tropa sang gobyerno kag sang rebelde nga grupo humalin sang Hulyo 21, 2018.
Ginpasalig sang Philippine Army nga padayon ang kampanya sang  gobyerno agud papason ang mga katapo sang rebelde nga grupo nga amo ang nagasabwag sang kalakasan sa pungsod.