𝗣𝗔𝗥 — Nagbaskog ang Tropical Storm Carina (international name: Gaemi) subong nga Domingo, nga sa karon, yara sa ibabaw sang Philippine Sea kag nagapadayon nga ginapabaskog sang Southwest Monsoon ukon Habagat.
Suno sa Philippine Atmospheric, Geophysical and Astronomical Services Administration (PAGASA), ang sentro sang Carina ginabanta 350 kilometros sa sidlangan sang Casiguran, Aurora, samtang nagahulag pa-nakatundan sa kadasigon nga 20 kph.
Ang Carina may maximum nga sustained wind nga 85 km/h malapit sa sentro, pagmadlos tubtob 115 kph, kag central pressure nga 996 hPa.
Ginpahayag man sang PAGASA nga ang bagyo may strong- to gale-force winds nga nagalab-ot tubtob 320 km halin sa sentro.
Samtang wala naman sang Tropical Cyclone Wind Signals (TCWS) nga naga-epekto subong nga mga tinion.
Apang, ang Wind Signal No. 1 mahimo nga mapataas sa ibabaw sang extreme Northern Luzon kag sa naaminhan-nasidlangan nga bahin sang mainland Cagayan, posible sa karon sang gab-i ukon sa Lunes.
Suno sa PAGASA, ang Habagat ang mas pabaskugon sang Carina kag isa ka tropical depression (nga anay Butchoy) ang magadala sang mabaskog tubtob gale-force nga pagmadlos sang hangin sa masunod nga mga lugar:
Subong nga adlaw tubtob Lunes sang udto: Mimaropa, Bicol Region, kag Western Visayas.
Halin Lunes sang udto tubtob Martes sang udto: Zambales, Bataan, Metro Manila, Calabarzon, Mimaropa, Bicol Region, kag Visayas.
Halin Martes sang udto tubtob Miyerkules sang udto: Ilocos Region, Central Luzon, Metro Manila, Calabarzon, Mimaropa, Bicol Region, kag Visayas.
Ginalauman naman nga sa Mainland Cagayan kag Babuyan Islands ang may yara sang 50-100 mm nga matipon nga pag-ulan humalin subong nga adlaw tubtub Lunes sang hapon.
Gina-ekspektar man nga ang Habagat ang magadala man sang kasarangan tubtob mabaskog nga pag-ulan sa nagkalain-lain nga lugar sa western portion sang Luzon sa Lunes tubtub Martes.
Sa masunod nga 24 oras, ang Carina kag ang nagbaskog nga Habagat magadala man sang kasarangan sa kadagatan sa ibabaw sang coastal areas kag sa naaminhan nga baybayon sang Northern Luzon (1.0-2.5 m), sa nakatundan nga baybayon sang Sentral kag Nabagatnan nga Luzon (1.5-2.5 m), kag sa eastern nga baybayon sang pungsod. (1.0-2.5 m).
Gin-athag man sang PAGASA nga posible mangin severe tropical storm ang Carina sa karon sang gab-i kag maglab-ot sa typhoon category sa Lunes sang gab-i.
Sa ibabaw sang Dagat Pilipinas, ang Carina makita nga nagahulag sa pangkabilugan pa-aminhan-nakatundan pakadto sa aminhan halin subong nga Domingo tubtob sa Martes.
Si Carina magapabilin man nga malayo sa landmass sang Pilipinas kag magagwa sa Philippine Area of Responsibility sa Miyerkules sang gab-i (Hulyo 24) ukon Huwebes sang aga (Hulyo 25) samtang nagasaylo malapit sa mga isla sa Ryukyu archipelago.
