Pilason ang isa ka truck driver matapos ginluthang sang kaangay man sini nga driver sa Barangay Balabag, Pavia, Iloilo.
Ang biktima amo si Glen Pasol, 48, residente sang Barangay Sambag Culob, Anilao, Iloilo samtang ang suspek amo si Adrian Lozada Latoza, 43, residente sang Barangay Bagongbong, Lambunao.
Sa interview sang Bombo Radyo kay Police Master Sergeant Luther Maderse, imbestigador sang Pavia Municipal Police Station, iya ginpahayag nga mismo ang biktima ang nag-identify sa suspek bangud conscious pa man ini sang nag-responde ang pulis.
Base sa panaysayon sini, pasado 8:00 kagab-i, naga-inum-inom siya kag ang iya hinablos sa barracks, samtang separado naman apang malapit lang ang suspek nga naga-inom man apang may lain nga kaupod.
Sang naghalin na ang partner sang suspek, ginpahayag nga ginkadtuan sini ang pwesto nanday Pasol, diretso ini nga gintiro sa tiyan, kag gilayon nga nagpalagyo.
Ginpahayag nga antes pa man natabo ang insidente, nakabaisay ang duha sang nagligad nga adlaw kaangot sa ila trabaho sa trucking services.
Na-recover naman sang mga barangay tanod sa kaiping nga barangay ang sling bag nga nagaunod sang pusil nga amo ang ginapatihan gingamit ni Latoza sa krimen.
Padayon nga ginabulong ang biktima sa ospital samtang ginapangita naman ang suspek.#
