ILOILO CITY- Nahulog sa pil-as ang isa ka truck nga may karga nga sinako nga semento sa Barangay Madarag, San Enrique, Iloilo subong nga aga.
Ang mga biktima amo ang driver nga si Jo-An Padilla, 39, residente sang Barangay San Antonio, Pilar, Capiz kag ang pahinante nga si Jay-R Reyes, 30, residente sang Barangay Abong, Carles, Iloilo kag ginapahayag nga napilpilan sang truck.
Sa inisyal nga impormasyon, posible nga nawad-an sang kontrol ang driver sa nagakurbada nga parte sang dalan rason nga nahulog sa pil-as.
Sa interview sang Bombo Radyo kay Police Captain Airel Dawn Parcon,hepe sang San Enrique Municipal Police Station, iya ginpahayag nga sang nadulaan na sang kontrol ang driver kag daw mahulog na ang truck, nakalumpat ini apang wala naman nakagwa ang pahinante.
Suno kay Parcon, ginabanta nga masobra sa 100 ka tapak ang kataason sang pil-as kag sa kanal nagtupa ang ulo sang truck kun sa diin na-trap ang pahinante.
Ginpahayag nga madasig ang dalagan sang truck nga naghalin sa Iloilo City kag padulong kuntani sa Capiz agud mag-deliver sang semento.
Madasig naman nga gindala sa ospital ang driver matapos ang aksidente.
Padayon pa nga gina-rescue ang pahinante.
