Ginkumpirma ni Philippine Ambassador to the United States Jose Manuel Romualdez nga gin-imbitar ni United States President Donald Trump si President Ferdinand Marcos Jr. nga mangin kabahin sang “Board of Peace.”
Suno kay Romualdez, ginpadala ang imbitasyon paagi sa isa ka personal nga sulat halin kay Trump.
Wala pa sang deadline nga ginhatag kun san-o makakumpirma ukon makasabat ang Pilipinas sa amo nga imbitasyon, apang suno kay Romualdez, posible nga makahatag na sang commitment si Marcos sa masunod nga sinemana.
“Our Department of Foreign Affairs and, of course, our other institutions, we are looking at what are the angles and how we can help,” pahayag ni Romualdez.
Ang kada founding member sang BOP ang gina-require nga maghatag sang $1 billion ukon P58.74-billion kada isa para sa pondo.
Ginklaro naman ni Romualdez nga bukas lamang ang Pilipinas sa paghatag sang non-monetary contributions kaangay sang human resources.
Ini nga board amo ang isa ka multinational body nga gintukod ni Trump sang Enero sa World Economic Forum sa Switzerland nga nagatuyo sa pagduso sang kalinong sa mga lugar nga apektado sang gyera sang Israel kag Hamas.
Ginalauman nga ini nga board ang makahatag sang strategic oversight kag makahulag sang international resources samtang gina-restore ang Gaza.
May yara ini subong sang 26 ka founding member states.#
