Ginapaabot ni United States President Donald Trump nga magabisita si Chinese President Xi Jinping sa iya sa Washington D.C. apang wala ini sang ginhatag nga petsa.
Suno kay Trump, posible nga may bag-o sila nga mahimo nga kasugtanan kaangot sa negosyo.
“We’ll have, ultimately, President Xi, we will have everybody coming (to the U.S.),” suno sa American leader.
Madamo ang nagabantay sa sini nga meeting sang duha ka lider bangud amo ini ang ginalantaw nga makapahagan-hagan ukon makapa-atrasar sang ginapatuman nga taripa sa mga imported product.
Nobyembre 2023 sang katapusan nga nagbisita ang Chinese president sa US kun sa diin may meeting ini kaupod kay former President Joe Biden kag nakasugtan ang pagbalik sang military-to-military communications kag pagtapna sang fentanyl production.
Antes pormal nga nag-umpisa si Trump sa iya trabaho sa White House sang Enero 20, naka-istoryahanay man sila ni Xi kaangot sa kontrobersyal nga isyu sa TikTok, trade, kag isyu sa tension sa Taiwan nga gina-angkon sang China.
