Naghatag si United States President Donald Trump sang 50 ka adlaw agud nga maresolba sang Russia ang kumplikto sini sa Ukraine.
Kun indi ini mahimo suno sa presidente, mangatubang gid ang Moscow sang mabug-at kag bag-o nga economic sanctions.
Matapos na-istorya si NATO chief Mark Rutte sa White House, ginpahayag ni Trump nga wala na gid siya nalipay sa mga ginapanghimo sang Russia. Lakip sa ginpaandam sini amo ang pagdagdag sang malala nga taripa nga lab-ot sa 100% kun wala pa gid sang kasugtanan nga malab-ot.
“We’re going to be doing very severe tariffs if we don’t have a deal in 50 days,” suno kay Trump. “Tariffs at about 100%, you’d call them secondary tariffs. You know what that means… I use trade for a lot of things. But it’s great for settling wars.”
Target man sini ang nabilin nga trade partners sang Russia agud nga mabudlayan ang Moscow nga makabangon ilabi na sa tunga sang ginasuprer sini subong nga Western sanctions.
Ginbuyagyag man ni Trump kag ni Rutte ang ila nakasugtan kun sa diin magabakal ang NATO military alliance sang mga armas halin sa United States.
Namensyonar nga lakip sa baklon amo ang Patriot anti-missile batteries nga amo ang ihatag sa Ukraine agud mabuligan ini nga magbato sa atake sang Russia nga nag-umpisa pa sang Pebrero 2022.
Una na nga ginpahayag ni Trump nga wala sini naluyagan ang mga ginpanghimo ni Russian leader Vladimir Putin nga sa baylo nga untaton ang tatlo ka tuig nga gyera, nagpalupad pa ini sang missiles kag drones agud nga mas palalaon ang away sa kaiping sini nga pungsod.
