Opisyal nga ginlunsyar ni US President Donald Trump ang “Trump Gold Card” visa program sang Disyembre 10, nga nagahatag sang oportunidad sa mga pumuluyo sang iban nga pungsod nga makabaton sang legal U.S. permanent residency pinaagi sa dako nga kontribusyon.
Ginpahayag sa White House nga ang programa nagapaumpisa sa bag-o nga website trumpcard.gov kun sa diin pwede maka-apply ang interesado kag nagapasalig sang “U.S. residency in record time.”
Ang Gold Card ginlaragway nga may kapareho nga pribilehiyo sa green card ukon permanent resident status, kag ang mga nakabaton sini pwede makatrabaho kag magpuyo permanente sa U.S.
May plano man nga maglunsyar sang mas mahal nga kategorya nga ginatawag “Trump Platinum Card” sa balor nga $5 million nga nagahatag sang dugang nga benepisyo sa mga foreign nationals, lakip na ang posibilidad nga makapuyo sa U.S. tubtub 270 ka adlaw nga wala sang pagabayran sang buwis sa non-U.S. income.
