Maga-implementar si US President Donald Trump sang 20% nga tariff rate sa mga produkto sang Pilipinas nga magasulod sa Estados Unidos sang Amerika.
Sa sulat nga ginpadala ni Trump kay President Ferdinand “Bongbong” Marcos, Jr. nga napetsahan sang Hulyo 9, 2025, ginsiling sini nga madugay na nga indi patas ang trade sa tunga sang US kag Pilipinas.
Bangud sini, himuon sini nga mas mahal ang buwis nga kinahanglan bayaran para sa mga ipasulod nga mga serbisyo kag mga produkto sang Pinoy sa Amerika.
Epektibo ang bag-o nga taripa umpisa sa Agusto 1.
Nalakip ang Pilipinas sa panibag-o nga round sang tariff letters nga gin-isyu ni Trump kun sa diin 30% sang taripa ang ginsukot sini sa Algeria, Iraq, Libya kag Sri Lanka kag 25% naman sa Brunei kag sa Moldova.
Ang 20% nga ipatuman sa Pilipinas ang mas mataas sa 17% rate nga una gin-set sang Abril 2.
Matandaan nga sa una nga desisyon ni Trump, gin-suspende anay ang tariff rates nga ginsukot kag ginhimo lamang nga 10% tubtub sang Hulyo 9 agud nga mahatagan sang tyempo ang mga pungsod nga mag-negosyar.
Matandaan nga una na nagsulat si Trump sa South Korea kag Japan nga naga-impose sang 25% nga taripa sa mga produkto sang amo nga mga nasyon.#
