Ginpaguwa na sang korte ang pormal nga sentensya batok kay United States President-elect Donald Trump matapos nga na-convict ini sang nagligad nga tuig sa Stormy Daniels hush money case.
Ginsentensyahan si Trump sang ‘unconditional discharge’.
Nagakahulugan ini nga indi siya pagpresuhon kag wala sang iban nga penalidad nga i-isyu, apang yara gihapon ang conviction sa iya record, buot silingon, magapungko siya bilang presidente subong nga tuig bilang isa ka convicted felon.
Permanente nga magamarka ang iya pangalan sa maragtas bilang labing-una nga presidente sang Estados Unidos sang Amerika nga convicted sa kaso-kriminal.
Ang prosecutors amo ang nag-rekomendar sang sentensya kag nagsiling pa sa korte nga dapat respetuhon nila ang opisina sang presidente kag ang natalana nga inagurasyon sa amo nga 78-anyos nga Republican leader.
Ini nga conviction ang kasunod sang 34 charges sang business fraud nga naangot sa hush money payment sa porn star nga si Daniels sang 2016 presidential campaign.
Napamatud-an sa korte nga guilty siya sa pagpeke sang business records sang Mayo pa sang 2024 apang pila ka beses nga naisol ang pagsentensya sa iya.
Una ini nga gin-schedule sang Hulyo 2024 apang gin-atras sang huwes matapos nagguwa ang ruling sang Korte Suprema nga nagadeklarar sa mga presidente nga immune sa prosecution para sa mga akto sang yara pa sila sa posisyon.
Sunod ini nga gin-schedule sang Septyembre apang gin-delay liwat kag ginpauna anay ang presidential election nga sang ulihi gindaog man mismo ni Trump batok kay Vice President Kamala Harris.
Bisan pa sang mga debate, gindayon subong ang sentensya nga amo ang petsa antes ang pormal nga pagbalik sang Republican sa White House sa Enero 20.
