Nag-angkon sang nanari-sari nga reaksyon ang anunsyo ni President-elect Trump nga himuon niya nga opisyal nga pagsulundan sa Estados Unidos sang Amerika nga duha lamang ka mga gender ang ila nga kilalahon — ang babaye kag ang lalaki.
Sa iya speech sa atubang sang conservatives sa Phoenix, Arizona, ginpahayag sini nga sa una nga adlaw sang iya pagbalik bilang president, untaton niya ang ginatawag nga “transgender lunacy.”
Suno kay Trump, pirmahan niya ang executive orders agud tapnaon ang child sexual mutilation kag paguwa-on ang transgender sa military, sa elementary schools, sa middle schools, kag sa high schools.
Ginpahayag man sini nga indi niya pagpa-intrahon ang mga lalaki sa sports events sang mga babaye.
“With the stroke of my pen on day one, we’re going to stop the transgender lunacy… I will sign executive orders to end child sexual mutilation, get transgender out of the military and out of our elementary schools and middle schools and high schools,” kabahin sang statement.
“Under the Trump administration, it will be the official policy of the United States government that there are only two genders, male and female,” dugang sini. “Doesn’t sound too complicated, does it?”
Nahibaluan nga ang isyu sa transgender isa sa pinakadaku nga ginabaisan sa US sa sini nga mga tinuig bangud lain-lain nga mga direksyon ang luyag sang Democrats kag Republicans ilabi na sa mga polisa kaangay sang medical treatment kag ano nga mga libro kag topiko ang pahanugutan sa public ukon school libraries.
Sang nagligad nga semana, sang gin-aprubahan sang US Congress ang tuigan nga defense budget, ginlakip ang probisyon agud nga balabagan ang pag-pondo sa transgender medical treatments para sa kabataan sang military members.
May 10,000 ka transgender nga naga-edad 6 to 22 nga may ginikanan nga aktibo sa military sa Estados Unidos base sa data sang Modern Military Association of America.
