Indi na magpadalagan liwat si anay United States President Donald Trump sa 2028 presidential election pananglitan malutos siya sa piniliay sa Nobyembre subong nga tuig.
Ini ang latest nga statement sang 78-anyos nga Republican leader matapos ginpamangkot sa US news program nga “Full Measure”: “No, I don’t. I think that that will be, that will be it. I don’t see that at all.”
Sa pihak sini, nagpahayag man ang Republican leader nga nagalaum siya nga mangin madinalag-on siya sa balota sa binotohay sa November 5.
Halos patas subong si Trump kag ang Democratic candidate nga si Vice President Kamala Harris lakip na sa key battleground states nga amo ang ginabantayan nga makatumod sang winners sa elections.
Nagsaka ang suporta sa Democrats matapos nag-withdraw sa eleksyon si 81-anyos nga si President Joe Biden sang Hulyo kasunod sang iya tuman ka pigado nga debate performance batok kay Trump.
Samtang sinemana na lang ang nabilin antes ang Nobyembre 5, nagpasugot pa si Harris sa ikaduha nga presidential debate batok kay Trump sa CNN, apang nangindi na ang Republican bangud atrasado na suno sa iya.
Gintumod sini ang pagsugod na sang in-person voting sa Minnesota, Virginia kag South Dakota kag may pila na ka postal ballots nga napadala antes sini.#
