Dayunon ni anay United States President Donald Trump ang pagpadulong sa Milwaukee sa state sang Wisconsin subong nga adlaw apisar pa sang assassination attempt batok sa iya kadungan sang iya rally sa Pennsylvania ‘las sais sang Sabado sang gab-i oras sa amo nga estado (ukon ‘las sais kahapon sang aga oras sa Pilipinas).
Suno kay Trump, indi sini matugutan ang anuman nga sirkumstansya, ang shooter, ukon ang potential nga assassin nga i-delay ang iya schedule sa pagtambong sa Republican National Convention.
Sa amo nga convention sa Milwaukee, natalana niya nga batunon ang nomination sang Republican Party bilang opisyal nga kandidato sa pagka-presidente sa 2024 elections kag natalana man nga iga-anunsyo ang iya mangin runningmate.
Nakatalana naman ang iya speech sa Huwebes.
Matandaan nga sa Butler Country sa Pennsylvania, isa ang patay kag duha ang napilasan bangud sa pagpangluthang sang suspek nga ginkilala nga si Thomas Matthew Crooks, 20-anyos, residente sang Bethel Park sa amo man nga estado.
Sang ulihi, ang amo nga gunman ang napatay man sa kamot sang Secret Service agents.
Base sa satellite images, naka-posisyon ang shooter sang ginabanta 490 ka tapak halin sa stage sang ginhimo sini ang amo nga assassination attempt batok kay Trump.
Nagaguwa sa imbestigasyon nga isa ka kitchen worker ang suspek kag may dala nga AR-style rifle sang ginhimo sini ang krimen.
Base sa state voter records, nakit-an nga isa ini ka rehistrado nga Republican kag gin-report man nga naka-donate sang $15 ukon masobra P800 sa liberal campaign group nga ActBlue sang 2021.
Sandig sa US media reports, sang tion nga ginhimo sini ang krimen, nagasuksok si Crooks sang T-shirt halin sa Demolition Ranch, isa ka YouTube channel nga kilala sa mga content sini kaangot sa mga armas kag explosive devices.
Ginapatihan man sang otoridad nga ang pusil nga gingamit agud tiruhon si Trump ang ginbakal sang amay sang suspek anum ka bulan na ang nagligad.
Pila ka oras matapos ang shooting sa Trump rally, ginpahayag man sang law enforcers nga may nakit-an nga makaduluda nga mga device ukon mga materyales sa paghimo sang bomba nga yara sa salakyan kag balay sang suspek.
Padayon pa subong ang imbestigasyon sang otoridad kun ano gid ang motibo sini kag kun ini ang naangot na sa pulitika.
