Ginpirmahan ni United States President Donald Trump ang executive order nga naga-establisar sang White House Task Force nga amo ang magatutok sa preparasyon sang pungsod sa pag-host sa prestiyoso nga FIFA World Cup sa 2026.
Si Trump mismo ang mangin chairman sa task force, samtang magaserbe naman bilang vice chair si Vice President JD Vance.
May magapungko man nga executive director apang wala pa nahingadlan kun sin-o ini. Ini nga opisyal amo ang maga-oversee sang adlaw-adlaw nga operasyon.
Masobra walo ka milyon nga international visitors ang ginalantaw nga magaabot sa US para sa isa ka bulan nga tournament nga maga-umpisa sa Hunyo 2026.
Mangin host man sa hinampang ang Canada kag Mexico, mga pungsod kun sa diin may isyu subong ang United States bangud sa taripa nga ginalantaw magaresulta sa trade war kag economic downturn.
Sa 2026, yara sa 48 ka mga team ang magahampang sa 104 matches sa tatlo ka mga pungsod nga amo ang una nga tion sa maragtas nga tatlo ka mga nasyon ang maga-host.
Katapusan nga ginpatigayon ang FIFA World Cup sa Qatar sang Disyembre 2022 kun sa diin nangin kampyon ang Argentina sa pagpanguna ni Lionel Messi.
