Gin-anunsyo sang White House nga na-diagnose nga may chronic venous insufficiency si United States President Donald Trump.
Suno kay Press Secretary Karoline Leavitt, nakabatyag sang paghubag sa iya nga batiis ang presidente gani gin-examine siya sang iya nga doktor nga si Capt. Sean Barbella.
Ginhimo sang doktor ang bilateral lower extremity venous doppler ultrasound kag naguwa nga may chronic venous insufficiency ang 79-anyos nga lider.
Suno pa kay Dr. Barbella, normal lang ini nga balatian sa mga tawo nga nagaedad 70 pataas.
Ginpasiguro naman ni Leavitt nga ang tanan nga laboratory tests sang presidente yara lang sa normal nga lebel kag wala sang ebidensya sang madalum nga vein thrombosis ukon arterial disease.
“Importantly, there was no evidence of deep vein thrombosis (DVT) or arterial disease” pahayag sini. Dugang sini, ang tanan nga lab testing ang “within normal limits.” Nagpaidalom man ang presidente sa echocardiogram. “No signs of heart failure, renal impairment, or systemic illness were identified.”
Ang chronic venous insufficiency amo ang kondisyon kun sa diin ang mga balbula sa sulod sang ugat wala na naga-function sang maayo rason nga indi na maka-flow sang maayo ang dugo.
Ginabantala nga mga 150,000 ka tawo sa bug-os nga kalibutan kada tuig ang apektado sini nga balatian, kun sa diin ang mga sintomas naga-upod sang paghubag sa ubos nga bahin sang batiis ukon tiil, kasakit ukon pagpanakit sa hita, varicose veins, kag kasakit sa panit.
