Naglain na naman ang tono ni United States President Donald Trump samtang padayon ang diskusyon sa kun paano tapuson ang gyera sang Ukraine kag Russia.
Sa latest interview kay Trump, ginsiling sini nga tuman ang iya kaakig kay Russian leader Vladimir Putin bangud ginakwestyon sini ang kredibilidad ni Ukrainian President Volodymyr Zelensky.
Ginsiling sini nga naugot siya bangud sa ginapanghambal ni Putin nga kakason si Zelensky bilang lider sang Ukraine bilang parte sang peace process.
Suno pa kay Trump, kun indi sila makalab-ot sa kasugtanan kun paano tapuson ang gyera sa Ukraine kag kun sa pamatyagan niya sala ini sang Russia, magadagdag siya sang taripa sa langis nga halin sa Moscow.
Nahibaluan nga ginaduso ni Trump ang madasig nga pagtapos sang tatlo ka tuig nga gyera sa Ukraine, apang wala pa gihapon sang daku nga development sa negosasyon matapos ginbasura ni Putin ang joint US-Ukrainian plan sa 30-day ceasefire.
Antes sini, matandaan nga si Trump kag si Zelensky ang nagbaisay man mismo sa Oval Office sa White House sang naistoryahan ang gyera. Nasaksihan pa ini sang bilog nga kalibutan bangud natabo ang pagbaisay kag pagpang-insulto sang US president kay Zelensky sa atubang mismo sang media.
