Gintawgan ni United States President Donald Trump ang mga presidente sang Russia kag Ukraine agud istoryahan ang gyera sang duha ka pungsod sa Europa.
Suno kay Trump, malawig kag produktibo ang iya pag-istorya kay Russian leader Vladimir Putin on Wednesday kag nagpasugot ini nga umpisahan ang negosasyon agud matapos ang giera sini batok sa Ukraine.
Ginkumpirma naman ni Kremlin spokesman Dmitry Peskov ang phone call nga naglawig sang isa ka oras kag tunga. Pahayag sini, suportado ni Putin ang ideya ni Trump nga nag-abot na ang tion agud magbuligay sila.
Gin-imbitar man ni Putin ang American president nga magbisita sa Moscow.
Sunod man nga gin-istorya ni Trump si Ukrainian President Volodymyr Zelenskyy kag ginpahayag nga gusto naman sini sang kalinong.
Tensyonado ang relasyon sang Kyiv kag Moscow halin sang nagsugod ang gyera sang Pebrero 2022.
