Nagbalik na sa iya campaign rally si anay US President Donald Trump sa labing-una nga tion halin sang nakaluwas ini sa isa ka assassination attempt sa Pennsylvania sang nagligad nga semana.
Ginapatigayon ini nga kampanya sa state sang Michigan pila ka adlaw matapos ang Republican National Convention kun sa diin opisyal na siya nga ginhingadlan bilang presidential candidate sang partido para sa 2024 presidential elections.
Sa Grand Rapids sa amo nga estado, makaupod ni Trump ang 39-anyos nga anay kritiko kag subong amo na ang iya nga vice presidential pick nga si Ohio US Senator JD Vance.
Una na nga nagpahayag ang Republican Party nga ang natabo kay Trump sang nagligad nga semana ang mangin rason sang national unity.
Indi pa maathag kun ano ang mangin kaundan sang speech nga ideliver sini subong nga adlaw, apang ginalantaw nga may bag-o naman ang pagpang-atake sa Democrat president nga si Joe Biden nga subong na-isolate sa Delaware bangud sa pagpositibo sa Covid-19.
Patigayunon ang rally ni Trump subong nga adlaw sa isa ka indoor arena — indi kaangay sa event sa Butler, Pennsylvania sang weekend kun sa diin ginhiwat ini outdoors kag nakasaka ang suspek sa atop sang building sa guwa na sang Secret Service perimeter antes sini ginluthang si Trump kag napatay pati ang isa ka tumalambong.
