Liwat nga nagpaandam si US President Donald Trump nga daku nga kunsekwensya ang atubangon sang Russia pananglitan indi magsugot si Russian leader Vladimir Putin sa ceasefire.
Ginbuy-an ni Trump ini nga paandam antes ang ila meeting ni Putin sa Alaska sa Byernes agud istoryahan ang ginaproponer nga kasugtanan agud mauntat ang gyera sa Ukraine.
“I don’t have to say. There will be very severe consequences,” sabat ni Trump kun taripa ukon sanctions ang buot-silingon niya sa “kunsekwensya.”
Antes sini nga meeting, nagtawag man si Trump sa mga lider sa Europa lakip na kay Ukrainian President Volodymyr Zelensky. Suno kay Zelensky, ginpasalig sang American leader nga handa ang US nga padayunon ang suporta sini sa Kyiv.
Ginpahayag nga lakip sa meeting sang “coalition of the willing” amo ang Germany, France kag United Kingdom.
Apisar wala pa natabo ang Trump-Putin meeting, nagaguwa man subong ang mga inisyal nga impormasyon nga posible magakitaay liwat ang duha ka mga lider kag updon na si Zelensky.
