Nagpaguwa sang pahayag si US President Donald Trump nga indi sila sa mag-untat sa pagpang-atake sa Iran tubtub sa masunod nga semana.
Pahayag sini, mas pabaskugon pa sini ang ila pagpamomba.
Suno naman kay Pete Hegseth, Secretary of Defense sang US, masobra 15,000 ka target ang halin sa Iran ang gin-atake na sang US kag Israel halin sang pagsugod sang gyera sang Pebrero 28.
Suno kay Hegseth, nagnubo na ang kapasidad sang Iran nga magbalos bangod madamo na nga missile, launcher kag drones ang nadula ukon naguba.
Samtang, ang bag-o nga Supreme Leader sang Iran nga si Mojtaba Khamenei napilasan man sa pag-atake kag may posibilidad suno sa Estados Unidos nga naka-angkon sang pilas sa iya nga nawong.
Matandaan nga nakapaguwa naman sang iya statement si Khamenei nga itimalos sini ang Iran apang wala ini sang audio ukon video nga makakumpirma sang reports kun napilasan gid man siya sa gyera.
Ang gyera sa Middle East ang nagbilin man sang problema sa world oil market bangud sang pagsirado sang Iran sa Strait of Hormuz nga isa sa pinaka-importante nga alagyan sang suplay sang krudo nga ginadala sa madamo nga mga pungsod.
