Indi gihapon pagtugutan sang Iran Revolutionary Guards ang pag-export sang bisan isa ka litro sang langis halin sa Middle East kun magapadayon ang mga pagpang-atake sang Estados Unidos kag Israel batok sa ila.
Suno sa Iran Revolutionary Guard, i-shut down nila ang strategic Strait of Hormuz, kun sa diin nagalabay ang yara sa 20% sang oil transits sang kalibutan bulang balos sa nagapadayon nga inaway.
Kasunod sini, ginpaandaman ni President Donald Trump nga mas pabaskugon pa sang Amerika ang pag-atake sa Iran kun padayon ini nga magapamatok sa distribusyon sang oil supplies.
Suno kay Trump, dako na ang kahalitan nga naangkon sang militar sang Iran kag ginapaabot niya nga matapos ang tensyon antes pa ang apat ka semana nga timeframe nga ginhatag sang Amerika sa ila.
Ginpahayag man ni Trump nga ang gyera matapos lang kun mag-surrender ang gobyerno sang Iran.
Pahayag naman sang Israel nga nagatuyo ang mga ini nga patumbahun ang defense system sang Iran samtang naga-focus naman ang US sa pag-intercept sang Iranian missile kag nuclear capabilities.
Words by: Bombo Ian Gajete
