ILOILO CITY- Magapatigayon sang labing-una nga hublag- protesta ang mga Trump supporters sa Nevada, USA bangud sa ginaalegar hungod nga pagpadelay sang inisipay sang balota kag election results sa amo nga estado.
Sa interview sang Bombo Radyo kay Bombo International Correspondent Raul Sabido, isa sa Bombo Radyo Iloilo correspondents sa 50 ka estado kag isa ka distrito sa Estados Unidos, iya ginpahayag nga patigayunon ang hublag protesta sa Clark County Election Center.
Suno kay Sabido, nag-ugat ang reklamo sang mga Republicans matapos nga na-delay ang pagbukas sang iban nga polling places nga nagpa-extend sang pagbinotohay nga nagresulta sang delayed man nga inisipay sang boto.
Nahibaluan nga nagfile sang reklamo ang kampo ni Trump bangud sa nasambit nga extension sa diin nalakip sa polling places nga may extended hours ang mga lugar nga ginhingyo sang mga Democrats.
Ginpahayag ni Sabido nga may kakulang sang transparency kag pagtago sang election observation activities sa pagproseso sang mga balota sa iban nga syudad.
Matandaan nga temporaryo nga gin-untat sa Nevada ang vote counting sa 2020 election matapos nga kapin sa 75 per cent na sang boto ang naisip sa diin abanse si Joe Biden kay Donald Trump.
Ang Nevada may yara sang anom ka electoral college votes kag ginakabig nga battleground state.
