Nag-atubangay liwat si US President Donald Trump kag Chinese President Xi Jinping para sa isa ka bilateral talk sa South Korea.
Nagkamustahanay sanday Trump kag Xi sa masobra isa ka minuto antes sila nagsugod sang ila pribado nga pag-istoryahanay nga naglawig sang duha ka oras.
Gindayaw ni Trump ang ila meeting ni Xi kag gintawag ini nga isa ka daku nga kadalag-an.
Ginpahibalo man ni Trump nga magapatuman siya sang mas manubo nga taripa sa mga Chinese imports kag nagsiling nga hatagan sang China ang Amerika sang mas maayo nga access sa ginatawag nga “rare earth” ukon mga mineral nga ginagamit sa paghimo sang mga electric cars, computer hard drives, TV screens, jet engines, kag iban pa nga electronics kag military weapons.
Ginpahayag man ni Trump nga pirmahan sang Amerika kag China ang isa ka trade deal sa masunod nga mga inadlaw.
Ini amo naman ang una nga pag-atubangay nanday Trump kag Xi halin pa sang 2019 sang nagkit-anay sila sa G20 summit sa Osaka, Japan.
