Nagtaas ang trust rating ni Presidente Ferdinand “Bongbong” Marcos suno sa survey sang Social Weather Stations (SWS) sang Hunyo.
Sa ginpagwa nga pahayag sang Stratbase Group kahapon, ginpahayag nga nagtupa sa 48% ang trust rating ni Marcos sang tinalikdan nga bulan nga mas mataas sang 10 percentage points halin sa 38% sang Mayo.
Samtang, halos wala man sang dako nga pagbag-o sa rating ni Vice President Sara Duterte nga nagapabilin sa 61% sang Hunyo, ikumparar sa 60% sang Mayo.
Suno sa Stratbase, ginpatigayon sang SWS ang survey sang Hunyo 25 tubtob 29, 2025, sa 1,200 nga hamtong nga mga Pilipino sa bug-os nga pungsod. May ±3% nga margin of error ang amo nga survey.
Suno kay Stratbase Group President Prof. Victor Andres “Dindo” Manhit, importante ang resulta sang survey agud mahibaluan ang politikal nga kahimtangan sang nasyon kag balatyagon sang publiko sa mga nagapanguna nga lider sang pungsod.
“The significant increase in President Marcos’ trust rating signals a possible renewed public confidence in his administration,” suno kay Manhit. “He must sustain these trust ratings since they are crucial indicators of political stability and governance performance.”
Samtang, sa amo man nga survey, nakakuha si Senate President Francis “Chiz” Escudero sang 55% nga trust rating sang Hunyo nga mas mataas sang 8 percentage points kumpara sang Mayo.
Nagsaka man sang 8 puntos ang rating ni House Speaker Martin Romualdez sa 34% sang Hunyo.
Ginhingyo ang respondents sa sini nga survey nga i-assess ang lebel sang ila salig sa key government officials paagi sa masunod nga kategorya: very much, somewhat much, undecided if much or little, somewhat little, kag very little.#
