Ginpahayag sang Iloilo City Disaster Risk Reduction and Management Office nga posible ang tsunami nga maglab-ot sa kataason sang tatlo ka panalgan nga building kun matabu ang mabaskog nga linog halin sa Negros Trench.
Sang damlag lang, ginbuyagyag ni Mr. Darwin Papa nga kun magluntad ang magnitude 8.2 nga linog, mahimo ini magresulta sang daku nga tsunami nga magahampak sa baybayon sang Iloilo.
Ginpunto niya nga ini nga posibilidad kabahin sang ‘worst-case scenario’ nga ginahanda sang mga otoridad.
Sa interview sang Bombo Radyo kay Dr. Jerry Bionat, anay nga hepe sang Provincial Disaster Risk Reduction and Management Office, ginpahayag niya nga may kasaysayan sang mabaskog nga linog sa rehiyon.
Ginpahanumdom niya ang natabu sang Enero 25, 1948, sang ginbansagan nga ”Lady Caycay” earthquake nga may magnitude 7.8 kag nagdala sang daku nga damages sa Iloilo City kag iban pa nga banwa sa Panay.
Ginpahayag ni Bionat nga ang Guimaras indi makapugong sang tubig bangud ang tubig mangita gid sang agyan kon may tsunami.
Sa iya personal nga obserbasyon, indi makalab-ot sa kataason sang tatlo ka panalgan ang tsunami bangud may mga factors nga nagapugong sini.
Ginpahayag man niya nga wala pa sang record nga nagpakita nga ang Negros Trench nakahimo sang amo sina kabaskog nga tsunami.
Ginkumparar man ini sa mga tsunami nga natabu sa Japan sang 2011 kag sa Indonesia sang 2004 nga nagresulta sang madamo nga death toll kag damages.
Base sa mga pagtuon, posible nga maglab-ot sa 8 tubtob 12 metros ang kataason sang tsunami sa Iloilo City kon magluntad ang daku nga paghulag sang Negros Trench.
Ginaagda sang mga otoridad ang publiko nga magamit sang PHIVOLCS hazard maps kag magpamati sa mga pahibalo sang local nga disaster risk reduction offices.
Ginpanahanumdom man ni Bionat ang katawhan nga magpangamuyo kag magpanghanda sa espirituhanon kag pisikal nga pamaagi.
Interviewed by Bombo Donnie Degala/Bombohanay Bigtime
