Nagapadayon ang hugot nga kampanya sang Traffic and Transformation Management Office (TTMO) batok sa mga colorum nga tricycle nga naga-operate sa syudad sang Iloilo.
Sa interview sang Bombo Radyo kay Ret. Pcol. Uldarico Garbanzos, head sang nasambit nga opisina, iya ginpahayag nga naglab-ot na sa 344 ka mga tricycle ang na-impound bangud ang mga ini ang wala sang nagakaigo nga permit.
Suno kay Garbanzos, ang mga na-impound ang ginalakipan sang 96 ka E-trike, 4 ka pedicab, 167 ka ordinaryo nga tricycle, kag 82 ka motorsiklo, sa diin 298 sa mga ini ang na-settle na kag nabayran ang ila nga mga multa.
Ginpahayag niya nga sa idalom sang Tricycle Rationalization Program (TRP), ang mga tricycle nga wala sang MTOP kag franchise halin sa konseho sang syudad, dapat gid nga i-impound.
Matandaan nga nagsugod ang pagpangdakop sa mga colorum nga tricycle sang Hunyo 19 sa pagpanguna ni Col. Uldarico A. Garbanzos.
Sa idalom sang Regulation Ordinance No. 2024-116, ang mga tricycle drivers kag operators kinahanglan nga sa fixed routes lang gid sila mabyahe base sa ila nga franchise.
Aminado si Garbanzos nga sa subong indi masakop sang operations ang bilog nga syudad gani nagapangayo sila sang impormasyon angot sa pagbiyahe sang colorum nga mga tricycle.
Dugang pa, ginpahibalo man ni Garbanzos nga nagapakig-angot na sila sa mga barangay officials agud mapahamtang ang seminar sa mga drivers kag operators parte sa mga kasuguan kag regulasyon batok sa colorum nga operasyon.
