ILOILO CITY – Paralisado sa gihapon ang operasyon sa sugar mill sa Passi City Iloilo bangud sang padayon nga strike sang mga empleyado sini.
Masobra isa ka semana na ang strike nga ginapatuman sang mga empleyado sang Central Azucarera de San Antonio.
Ini ang may kaangtanan sa ginahingyo sang mga ini nga dugang nga suweldo kag benepisyo nagikan sa tagdumalahan sang sugar mill.
Ginpahayag sa Bombo Radyo ni Roberto John Oterio, presidente sang unyon sang mga trabahador, wala pa sila gin-atubang sang tagdumalahan sang sugar mill.
Ini apesar nga nagpadulong man sa azucarera ang tag-iya sang sugar mill.
Suno kay Oterio, apektado na ang mga planters sang tubo bangud sang nagakatabo nga strike.
Nahibaluan nga magluwas sa pag-supply sa pungsod, naga-export man sang kalamay ang Central Azucarera de San Antonio sa mga pungsod sa Southeast Asia.