ILOILO CITY – Ginalantaw sang bar owners association nga balik-awot ang pagpahanugot sa mga bars kag night clubs nga mag operate halin 6:00 ang gab-i tubtob kaagahon samtang ang baligyaanay sang makahulubog nga ilimnon ang tubtob lang 5:00 sang hapon sa syudad sang Iloilo.
Sa interview sang Bombo Radyo kay President Roxas Mayor Receliste Escolin kag Presidente sang bar owners association , iya ginpahayag nga luyag niya nga maathagan sa sini nga pagsulundan sang syudad bangud ang ginakuhaan man lang kuntani sang income sang bar kag night clubs amo ang pagbaligya sang makahulubog nga ilimnon.
Suno kay Escolin, wala pa sang may ginpatigayon nga pagsinapol sa mga bar owners association kag wala pa man naka-imbitar si Iloilo City Mayor Jerry Treñas.
Dugang pa sang natungdan, handa nga magsunod ang mga bars kag night clubs sa mga pagsulundan sang syudad apang nagapangabay ini nga kun mahimo mahatagan sang konsiderasyon ang oras sa pagbaligya kag pagbakal sang makahulubog nga ilimnon.
