TUBUNGAN, ILOILO – Personal naman nga nasaksihan ni Tubungan, Iloilo Mayor Roquito Tacsagon ang sitwasyon sang ginareklamo nga dalan sa Brgy. Sibucauan, Tubungan, Iloilo.
Sa interview sang Bombo Radyo kay Mayor Tacsagon, iya ginpahayag nga sang naghiwat sila sang isa ka aktibidad sa isa ka barangay, naagyan sini ang amo nga dalan, rason nga gilayon ini nga nagtawag sa project engineer sang dalan.
Suno kay Tacsagon, liwat sila nga nagbalik sa area agud nga direkta nga makarekomenda ang engineer sang suhestyon.
Insigida naman nga ginpakanalan sang alkalde ang dalan kag gilayon nga ginpabutangan sang item 200 agud nga indi na ini mangin malutak, apang, bangud man sa padayon nga pagtupa sang ulan, nagapabilin nga basa kag madanlog ini.
Ginpahayag man sini nga kon padayonon sang kontraktor nga tambakan ang dalan, madasig man nga nagalubong ang mga salakyan.
Ini ang rason kon ngaa ginpakamaayo nga untatan lang anay ang pagtambak.
Nagpasalig naman ang alkalde nga liwat nga tambakan ang dalan kon magahagan-hagan na ang pagtupa sang ulan.
Luyag man sini nga mahibaluan sang mga residente nga kon liwat-liwat nga patambakan ang dalan kag naga-ulan, mas nagadalom lang ang alagyan.
