ILOILO CITY – Magaabot na subong nga adlaw sa Manila ang tul-an sang Ilonggo OFW nga ginpatay sa South Korea kag gintago sa water tank.
Ini ang ginkumpirma sa Bombo Radyo ni Special Assistant to the President Christopher “Bong” Go.
Suno kay Go, buwas nga adlaw naman dal-on diri sa Iloilo ang mga tul-an ni Angelo Claveria, 34 anyos, sang Rizal Ilawod, Cabatuan, Iloilo.
Buwas nga adlaw natalana man magpadulong si Go sa puluy-a sang pamilya Claveria agud personal nga ihatag ang bulig sang gobyerno.
Nagalab-ot sa P220,000 nga death kag burial benefits ang igahatag sang gobyerno sa pamilya Claveria.
Nahibaluan nga 2016 pa nadula si Claveria nga nagatrabaho bilang factory worker sa Gyeonggi province sa South Korea.
Apang nakit-an ang tul-an sini sang Abril 3 sini nga tuig sa isa ka water tank.
Sa imbestigasyon sang South Korean police, ginapatihan nga ginpatay si Claveria sang apat ka mga Pinoy nga kaupdanan man sini sa trabaho.
Nangin madasig naman ang pagpauli sang mga tul-an ni Claveria matapos nga ginpalab-ot sang Bombo Radyo ang kaso sang Ilonggo OFW kay Go nga amo ang nagpakig-angot sa Department of Foreign Affairs kag Overseas Workers Welfare Administration agud madala pabalik sa Pilipinas ang tul-an ni Angelo Claveria.