Ginpisa-pisa ni Senator Raffy Tulfo ang Department of Trade and Industry (DTI) bangud sa ginapahayag indi healthy nga level sang sodium sa instant noodles nga ginabaligya sa Pilipinas.
Apang gin-insister naman sang ahensya nga indi sini mandato ang pag-regulate sang kadamuon sang asin sa mga pagkaon.
Sa budget hearing sa senado para sa proposed 2023 budget sang ahensya, bitbit ni Tulfo ang pila ka instant noodle products kag ginpakita ini sa mga opisyal sang DTI.
Ginpahayag sini nga nagaunod ini sang mataas nga lebel sang sodium nga indi na maayo sa ikaayong lawas sang tawo.
Apang depensa naman ni Trade Secretary Alfredo Pascual, indi ang DTI ang husto nga ahensya agud magsabat sa sini nga concern.
Gin-insister sini nga gina-handle sang DTI ang non-food items samtang ang Department of Health ukon ang Food and Drug Administration naman ang responsable sa iban nga produkto ilabi na ang food items.
Ginkainit naman sang senador ang sabat sang tiglikom.
“Ito na naman tayo nagtuturuan po kayo. Walang gustong umamin.
Dito naman sa article 10 ng Consumer Act nakalagay ‘on ur own initiative’ so dapat kayo mismo gumagawa ng initiative. Hindi na kayo dapat pagsabihan dahil at stake dito ‘yung welfare ng ating mahihirap na kababayan,” pahayag ni Tulfo.
Sang ulihi, nag-concede si Tulfo nga wala sang gahum ang Department of Trade and Industry nga mag test sa food products apang kuntani suno sa iya, gina refer man ini sa relevant nga ahensya sang gobyerno.
Nagpasalig naman si Pascual nga ipalab-ot ini nga concern sa Food and Drug Administration.
