ILOILO CITY – May yara sang negatibo nga epektibo sa mental health ang tuman nga exposure sa social media ilabi na subong nga may yara sang pandemic.
Sa Good Morning Philippines program, ginpahayag sang Psychology Professor nga si Moniq Muyargas sang University of the Philippines – Miagao, nga ang social media ang may yara sang bentaha kun ginagamit sang maayo apang may yara man ini sang disbentaha kun tuman naman ang exposure.
Suno kay Muyargas, ang social media ang may daku nga bulig ilabi na sa patag sang kumunikasyon, ginakuhaan sang balita kag kalingawan apang duha tubtub tatlo lamang ka oras sa isa ka adlaw ang ginapanugyan nga screen time.
Ang duha tubtub tatlo ka oras nga screen time ang mahimo nga tungaon sa aga, udto, hapon kag gab-i agud nga malikawan ang information overload nga amo naman ang nagatuga sang anxiety.
Ginpahayag ni Muyargas nga subong nga quarantine period, dapat nga mangin produktibo ang pagpangabuhi paagi sa pagpaninlo sa sulod sang balay, pag-exercise kag importante man ang pag-angkon sang family bonding.
Apisar nga may yara sang nagkalain-lain nga routine ang mga naga-istar sa rural kag urban areas apang ang importante amo nga dapat sundon ang healthy lifestyle.
Normal lamang nga makabatyag sang kahangawa subong nga may yara sang pandemic sa pungsod.
Sa pagpaathag ni Muyargas, indi malikawan nga makabatyag sang kahangawa kag kakulba ang tanan nga posible malatnan sang virus apang ang nasambit nga balatyagon ang tuga lamang sang kakulang sa paghangop tuhoy sa Coronavirus Disease 2019 (COVID-19).
Suno kay Muyargas, kun mahangpan sang lubos kun paano nagalaton ang virus, wala na sang diskriminasyon sa medical frontliners.
Sa pagpaathag sang natungdan, ang medical frontliners ang nakahibalo kun paano pangapinan ang kaugalingon kag kun paano matapna ang nasambit nga virus.
Ang diskriminasyon kag ang tuman nga pagbatyag sang kahangawa ang indi malikawan apang dapat ini nga pakigbatu-an kag sa baylo, dapat nga sundon ang simple nga pamaagi kasubong sang masami nga paghugas sang kamot kag likawan ang pagguwa sa balay kun indi man lang kinahanglanon agud nga indi malatnan sang COVID-19.
