Ginpatpat sang pila ka mga doctor ang mahimo padulongan ukon maabtan sang isa ka tawo nga naga-engage sa illegal drugs.
Sa interview sang Bombo Radyo kay Dr. Maria Lourdes Hembra, Chief of Hospital sang Department of Health – Treatment and Rehabilitation Center Pototan, iya ginpahayag nga ang ‘drug addiction’ ang isa ka chronic brain disease, kon sa diin, ang tawo nga nagagamit ang masami nga nagapangita sang iligal nga druga.
Suno kay Dr. Hembra, ang tawo nga adik sa druga ang indi maka-function sang maayo kon wala naga-hithit sang druga.
Gin-athag man sini nga masami man nga mindset sang mga illegal drug users amo ang makabulig ang paggamit sini sa ila trabaho ukon ginaubra, apang ang kamatuoran amo ang makatuga lamang sang pagkaguba sang utok.
Mahimo man nga magresulta sa mental health disorder ang tuman nga paggamit sang druga ilabi na kon indi gilayon nga matatapan.
Ginklaro man ni Dr. Mariano Hembra, isa ka adult and addiction psychiatrist, nga ang paggamit sang iligal nga druga indi makabig nga tumalagsahon lang bangud nangin parte na ini sang pang-adlaw-adlaw nga tanan sang mga na-adik sa druga.
Ginpahayag man sini nga indi lamang ang paggamit sang illegal drugs ang makaapekto sa pang-adlaw-adlaw nga routine sang isa ka tawo, bangud ang gulpiyada nga pag-untat gamit ang makaapekto man sa daily routine sang isa ka drug addict.
