Duha ka lalaki ang ginapangita sang mga pulis kasunod sang shooting incident kag pagpamahog nga natabo sa Zone 8, Brgy. Veterans Village, City Proper, Iloilo City.
Sandig sa impormasyon nga nakadangat sa Iloilo City Police Station 1, samtang nga yara ang tagreklamo nga si Fraulin Maratas sa basketball gym sang amo nga barangay kagab-i, gulpi lang nag-abot ang 29-anyos nga si Donnel Jeruta nga may dala nga armas.
Ginpahayag nga gintayaan pa ni Jeruta sang armas ang tagreklamo kag gintindakan sang makaduha ka beses.
Sang nagdalagan ang tagreklamo kag nagpanago, nagsinggit pa ang ginatudlo nga suspek kag sunod nga nabatian ang asud-asud nga paglupok sang armas.
Magluwas kay Jeruta nga tumandok sang Brgy. Rizal, Lapaz, Iloilo City, may yara pa sang isa ka lalaki nga ginapahayag kaupod sini sang natabo ang shooting incident.
Na-recover sa scene of incident ang 14 ka fired cartridge cases sang 9mm kag isa ka fired cartridge case sang 45.
Sa interview sang Bombo Radyo kay Punong Barangay John Eric David, iya ginpahayag nga pareho nga naga-negosyo ukon nagabulante ang tagreklamo kag ang ginatudlo nga suspek.
Gin-athag man ni David nga indi husto ang una naguwa nga impormasyon nga pulis ang involved sa insidente.
Nagaguwa nga may daan nga hiligut-anon sa tunga ni Jeruta kag sang complainant.
Ginpasalig man sang punong barangay nga himuon ang nagakaigu nga lihok agud nga mapasabat ang ginatudlo suspek ilabi na bangud natabo ang insidente sa basketball court kag kadamo sang posible nga nadalahig.
Gin-check sang Bombo News Team ang lugar apang ginpahayag nga wala naga-function ang closed-circuit television sa amo nga lugar. ##
