Masobra tunga sa milyon ka tawo sa Oregon sa Estados Unidos ang nag-evacuate sa lugar bangud sa makamamatay nga wildfire.
Suno kay Oregon Governor Kate Brown, wala pa siya sang may nakaptan nga insakto nga numero sang mga napatay sa lugar bangud sa sunog.
Sa subong, masobra 100 ka mga wildfires ang nagapadayon sa 12 ka mga western US states.
Ang Oregon, California kag Washington ang tuman nga naapektuhan sa diin kadam-an sa mga lugar ang nahalitan sang sunog.
Suno kay Rich Tyler, tagpamaba sang Oregon State Fire Marshal’s Office, ginalantaw nila nga may yara sang posibilidad sang arson nga nangin rason sang pagkasunog.
Pahayag niya, 19 ka mga temporary shelters ang ginatiniran sang mga evacuees.
Nahibaluan nga sa Washington state, isa tuig nga bata nga lalaki ang napatay samtang ang iya mga ginikanan ang yara sa kritikal nga kondisyon.
Sa California, may yara sang 10 ka mga bangkay ang nakit-an sang mga opisyal kag gina-expektar pa nga magataas ang numero sang mga napatay bangud may yara sang 16 ka tawo ang nagapabilin nga missing.
