Tunga sang mga kompanya nga nagahimakas sa manufacturing, energy, kag iban pa nga sektor sang industriya sa Asia-Pacific region ang nawad-an sang indi magnubo sa $1 million bangud sang cyberattacks nga nagdisturbo sa ila operasyon.
Sa isa ka pagtuon nga ginhimo sang cybersecurity firm upod sa VDC Research, nagaguwa nga may mga respondent man nga nagsiling nga ang ila kapierdehan naglapaw pa sa $5 milyon. Ini nagapakita sang kinahanglanon nga palig-onon pa gid ang proteksyon batuk sa mga hackers.
Nagaguwa man nga kon ang sistema sang isa ka kompanya mabuksan sang mga cybercriminal, nagakabig ini sang daku nga kapierdahan bangud sang unplanned downtime, pagkadula sang revenue, gasto sa pag-repair sang mga kagamitan, loss of inventory, kag bisan ransom payments.
Ang downtime amo ang pinakadaku nga problema sang mga biktima, bangud ang pagkadula sang operasyon nagalawig halin apat tubtub 24 ka oras. Dugang pa sa pagdula sang revenue, ini mahimo man maka-impact sa pagsalig sang mga kustomer sa kompanya.
