Ginsulod na sang otoridad ang duha ka ektarya nga compound nga ginapahayag ginatiniran sang mga “big boss” nga Chinese nationals nga nagadumala sa iligal nga mga aktibidad sang Philippine Offshore Gaming Operations (POGO) sa Bamban, Tarlac kag Porac, Pampanga.
Ini ang nahamtang sa Barangay Siñura sa Porac kun sa diin may nadiskubrehan pa ang mga pulis nga tatlo ka mansions, may firing range kag underground tunnel, apang kun lantawon sa guwa ang lugar, daw kaangay nga isa lang ini ka residential compound.
Suno kay Police Col. Jay Dimaandal, Pampanga police provincial director, nahamtang ang compound malapit singko kilometros halin sa mga opisina sang Lucky South 99 Outsourcing, Inc. sa Barangay Sta. Cruz nga gin-raid man sang otoridad sang nagligad nga bulan.
Nakit-an sa amo nga leisure hub ang masanag nga underground hallway kun sa diin nakalinya ang empty shelves samtang pakadto sa mga opisina kag kuwarto.
Ini nga mga kuwarto ang may yara sang glass sliding doors kag kun buksan, may gamay nga lagoon nga amo ang naga-separar sang mga kuwarto sa nabilin nga mga parte sang compound.
Wala pa ginsapubliko sang local government unit kun ano ang itsura sang firing range.
Magluwas diri, nakit-an man sang mga pulis ang gina-alegar nga torture devices ukon hazing paraphernalia, handcuff, baseball bat, kag mga dokumento.
Naaresto man sang otoridad ang mga tawo sa amo nga compound kun sa diin duha ang natumod nga incorporators sang Whirlwind Corp. nga amo ang kumpaniya nga nagprenda sang propiedad sa Barangay Sta. Cruz sa POGO hub nga Lucky South 99.
Natukiban man sa imbestigasyon nga gintukod ang resort kag amo nga residence nga wala sang building permit halin sa opisina sang alcalde sang Porac, kag wala man sang barangay clearance sa pagtukod sang compound.
Kun basehan ang statements sang mga residente sa lugar, ginapatihan nga ginsuguran-tukod ang pasilidad sang 2021 sang masami nakit-an ang Chinese nationals sa amo nga lugar kag halos kada semana ang hugpa sang helicopter.
