ILOILO CITY – Nagakanugon ang coach sang Technological University of the Philippines matapos gindeklarar nga default ang hampang sa tunga sang De La Salle University Dasmariñas sa basketball men sa nagapadayon nga University Games 2019.
Sa interview sang Bombo Radyo kay Allan Soria, coach sang Technological University of the Philippines, iya ginpahayag nga wala sila naka-abot sa gintalana nga oras bangud sa wala ginlauman nga mga hitabo.
Suno kay Soria, temprano pa sila naghalin sa Iloilo Sports Complex kun sa diin sila nagatinir apang ang ila ginsakyan nga bus ang tuman ka taas rason nga nagasaga-id sa atop sang salakyan ang wiring.
Ginpahayag ni Soria nga magluwas sa nagawayway nga wiring, tuman man ka traffic sa nasambit nga lugar rason nga napilitan sila nga maglakat agud nga makasakay padulong sa extension campus sang University of San Agustin.
Kun nakahampang lang kun tani sila suno sa natungdan, posible nga nakasulod pa sila sa finals sang basketball men.
Sa pihak sini, nagapasalamat naman ang coach bangud sa ila labing una nga University Games experience.
Samtang, suno naman kay Rolando Marañon, tournament manager sang basketball men, ila nga ginhatagan sang 15 ka minutos nga plaso ang Technological University of the Philippines apang napaslawan ang team nga maka-abot.
Suno kay Marañon, napilitan sila nga ideklarar nga default ang hampang kag ihatag ang puntos sa De La Salle University Dasmariñas.
Sa pihalk sini, mahimo pa kun tani nga madayon ang hampang kun nagpasugot lang ang kasumpong nga team.
