ILOILO CITY – Padayon ang paghatag sang bulig sang Department of Labor and Employment sa mga trabahador nga naapektuhan sang COVID-19 pandemic.
Sa interview sang Bombo Radyo kay Niezel Sabrido, tagpamaba sang Department of Labor and Employment Region 6, iya ginpahayag nga may yara sang nagkalain-lain nga programa ang ahensya apang ang Tulong Panghanapbuhay sa Ating Disadvantaged/ Displaced Workers (TUPAD) program bilang COVID measure lang ang nagapadayon sa subong.
Suno kay Sabrido, as of July 2020, naglab-ot na sa masobra sa 15,000 ang nahatagan sang assistance sa idalom sang nasambit nga programa.
Ginpahayag ni Sabrido nga ginahulat na lang nila ang guidelines gikan sa central office may kaangtanan sa pagpatigayon sang mga programa nga sakop sang Bayanihan 2 ukon Bayanihan to Recover as One Act nga ginpirmahan na ni Presidente Rodrigo Duterte bilang layi.
Indi naman magnubo sa 400 ka commercial establishment ang nagsirado ukon nagpamuhin sang empleyado bangud sa ginapatuman nga lockdown.
Santo sa record sang Department of Labor and Employment, kadam-an ang nahamtang sa Iloilo, Iloilo City, Bacolod City kag Negros Occidental.
Agud nga makabawi ang ekonomiya sang rehiyon, ginpahayag ni Sabrido nga kinahanglan nga amat-amaton ang pagbukas sang negosyo.
