Nagpaathag si Iloilo 5th District Representative Raul Tupas sa Iloilo Police Provincial Office (IPPO) matapos nga napaslawan nga makatambong sa ginpatigayon nga peace covenant signing.
Sa interview sang Bombo Radyo kay Pol. Col. Adrian Acollador, director sang IPPO, iya ginpahayag nga may conflict sa schedule ni Tupas apang nag-komiter ini nga mapadulong sa opisina sang IPPO sa separado nga petsa agud nga magpirma.
Nahibaluan nga isa si Tupas sa incumbent representatives sa probinsya sang Iloilo nga nagapare-elect sa 2022 elections. Tanan sila ang wala nakatambong sa peace covenant signing kahapon, Pebrero 9.
Sa mga wala nagtambong, sandig sa rekord sang IPPO as of press time, si Tupas pa lang ang nagtawag kag nagpaathag sa iya nga absence.
Wala naman nag-demand sang paathag ang IPPO bangud indi man ini mandatory, apang ginpasalamatan sini ang nangin presensya sang iban nga political aspirants ilabi na si Iloilo Governor Arthur Defensor, Jr. agud nga magtambong sa amo nga symbolic signing para sa palaabuton nga eleksyon.
Ang peace covenant signing ang ginakabig importante nga lihok para sa IPPO bangud ginaupod ang nga kandidato nga maghimo ukon mag-commit sa isa ka malinong kag matawhay nga eleksyon.
