ILOILO – Hugot nga ginapatuman sang gobyerno sang Thailand ang mga lihok nga ila ginapatigayon batok sa Coronavirus Disease 2019.
Ini matapos nga nagsaka na sa 43 ang kaso sang COVID-19 sa Thailand sa diin 31 diri ang nakarecover na, 28 ang nakapauli na kag 11 pa ang ang padayon nga ginabulong sa ospital.
Ginkumpirmar man sang Health Ministry sang nasambit nga lugar nga isa na ang napatay matapos matapikan sang nasambit nga balatian nga nagkomplika sa iya Dengue Hemmorhagic Fever.
Sa interview sang Bombo Radyo kay Bombo International Correspondent Cleo Rose Jondonero, direkta sa Thailand iya ginpahayag nga kalabanan sa mga pasyente ang mga Chinese nationals nga nagpadulong sa Thailand agud magsaulog sang Chinese new year.
Suno kay Jondonero, nagpasalig si Deputy Prime Minister kag Public Health Minister Anutin Charvirakul nga may yara sang nagaka-igo nga supply sang bulong sa Thailand para sa mga pasyente.
Dugang sang natungdan, nagpasalig man ang China nga magahatag sila sang bulong agud maggamit sa mga pasyente nga Chinese nationals nga yara subong sa Thailand.
Santo sa pahayag ni Jondonero, nagpanugyan man ang gobyerno sang Thailand nga indi anay magbyahe padulong sa mga pungsod nga apektado sang COVID-19 kaangay sang South Korea, China, Italy kag iban pa.
Ginpahayag man ni Jondonero nga wala pa nakalab-ot sa kritikal nga sitwasyon ang Thailand kun Coronavirus disease ang paga istoryahan bangud wala pa sila sang na rekord nga human to human transmission.
Suno man kay Jondonero, dako ang nangin epekto sang nasambit nga virus sa turismo sang Thailand bangud humalin sang nakalab-ot ini sa pungsod amat-amat nga nagnubo ang mga turista nga nagapadulong sa nasambit nga pungsod kag daw kaangay na nga ghost town ang mga sadto tourist spots.
